Etxebizitza Mahaia adostu eta martxan jarri du Errenteriako Udalak
Etxebizitza Planaren jarraipena eta koordinazioa egiteko sortutako mahai espezifiko honetan, udalean ordezkaritza duten alderdi politiko guztiak daude ordezkatuta.
2024ko otsailaren 6an, Errenteriako Udalak Tokiko Gobernu Batzordean onartu zuen Eusko Jaurlaritzari eskatzea Errenteria Etxebizitza Merkatu Tentsionatuko Eremu izendatzeko. Eskaera formala egin ahal izateko, udalerriaren errealitatearen diagnostiko xehatua eta 3 urterako Etxebizitza Plana onartu ziren. Plan horretan, errealitate horretan hainbat ikuspegitatik eragin nahi duten hainbat lan-ildo jasotzen dira.
Etxebizitza Plana egiteko prozesuan, Udalean ordezkaritza zuten alderdi guztiei beren ekarpenak egiteko aukera eskaini zitzaien, eta horietako batzuk behin betiko dokumentuetan sartu ziren. Era berean, plana zer gobernantza-modurekin ezarri behar den ere aipatzen du, erakundeen arteko koordinazioaren eta lankidetzaren alde eginez eta alderdien arteko elkarrizketaren eta lankidetzaren beharra azpimarratuz.
Planaren aginduari jarraituz, udal-ordezkaritza duten alderdi politiko guztiek osatutako lan-eremu hori urriaren amaieran sortu zen, eta abenduaren 5ean egin zuen lehen bilera. Errenterian etxebizitzaren arloan garatzen ari diren ekintzak partekatzea, Etxebizitza Planaren (2024-2027) jarraipena egitea eta ekarpenak biltzea du helburu.
2024-2027 Etxebizitza Plana
2024ko urriaren 2an Eusko Jaurlaritzak Errenteria gune tentsionatu izendatu zuen arren, Errenteriako Udala zain dago Etxebizitza Ministerioak ebazpena Estatuko Aldizkari Ofizialean argitaratzeko, eta une horretatik aurrera legeak izendapen horren bidez baimentzen dituen tresnak indarrean jartzea espero da.
Nolanahi ere, azpimarratu den bezala, tentsionatutako eremu izendatzea ez da berez nahikoa izango errealitatea iraultzeko, eta beharrezkotzat jotzen da Etxebizitza Plana garatzea, horrek jasotzen dituen lan-ildo eta alderdi desberdinetatik.
Hori dela eta, 2024an hainbat neurri hartu dira garatzen ari ziren lan-ildoak indartzeko, hala nola Eusko Jaurlaritzari lurrak lagatzea Altzaten etxebizitza publikoa eraikitzeko; “Fini Rubio” adinekoentzako apartamentuen proiektua definitzea; gazteentzako etxe komunitarioaren ordenantza aldatzea hobeto funtziona dezan; hutsik dauden etxebizitzak mobilizatzeko eta turismo-ostatuak kontrolatzeko zerga-neurri berriak hartzea; edo etxebizitza-eraikinen birgaitze integrala egiteko laguntzak ematea Beraun Planaren barruan, Eusko Jaurlaritzarekin lankidetzan.
2025erako aurreikusita dago, besteak beste, etxebizitza- eta birgaitze-bulego integral bat sortzea, gazteen emantzipazioa bultzatzeko udal-tresnak berrikustea, hutsik dauden etxebizitzen azterketa xehatua izatea, eta udalerri osoan EITak eta ondorengo birgaitzeak egitea bultzatzea eta laguntzea.
