Udalak agintaldiaren erdiko balantzea aurkeztu du: konpromisoen % 55 beteta, eta 2027rako bide-orri argia
Errenteriako Udal Gobernuak 2023-2027 agintaldiaren lehen bi urteen balantzea aurkeztu zuen atzo, Aldakonea eraikinean egindako ekitaldian. Aizpea Otaegi alkateak, Bernar Lemos eta Maite Gartzia alkateordeek lagunduta, egindako lanaren, martxan dauden proiektuen eta datozen urteetarako ekintza-ildo nagusien errepasoa egin zuen.
Otaegik azaldu zuenez, “Agintaldi Planaren % 55 garatu dugu, eta % 85eko betetze-maila lortzea aurreikusten dugu bukaeran”. Era azpimarratu zuen honako hau: “Errenteria eredu duinago, kohesionatuago eta bizigarriago baterantz doa, Udalak, eragileek eta herritarrek modu partekatuan eraikia”.
Bere hitzaldian, alkateak gogorarazi zuen Agintaldi Planak 70 proiektu estrategiko biltzen dituela, horietatik 19 dagoeneko osatu direla eta 40 gaur egun gauzatzen ari direla, “kudeaketa bizi, dinamiko eta etengabe eguneratzen ari denaren isla”.
Etxebizitza, udal-ekintzaren lehentasunezko ardatza
Tokiko Gobernuaren lehentasunezko eremuetako bat etxebizitza izan da. Errenteria gune tentsionatu izendatu den lehen euskal udalerria izan da, eta, horri esker, alokairuen prezioari mugak ezarri ahal izan zaizkio.
Aldi berean, Udalak 4 milioi euro baino gehiago bideratu ditu etxebizitza-politiketara, hutsik dauden etxebizitzak mobilizatzeko, turismo-lizentzia berriak bertan behera uzteko eta egungo etxebizitza-parkea berroneratzea sustatzeko neurriak bultzatuz. Era berean, Esnabideko eta Altzateko bi udal-partzela eskaini dizkio Eusko Jaurlaritzari, alokairuko 70 etxebizitza publiko baino gehiago eraikitzeko.
Zaintza-lanak duintzea
Gizarte arloan, Udalak zaintza politikak indartu ditu, nahi ez den bakardadearen aurkako estrategia zabalduz — 1.900 adineko pertsona baino gehiagorengana iritsi da — eta Etxez Etxeko Laguntza Zerbitzuaren aurrekontua % 56 handituz, azpikontratatutako langileen baldintza ekonomikoak udal langileenekin parekatzeko.
Gazteen osasun mentala prebenitzeko programa pilotu bat ere garatu da, 1.200 gazte baino gehiagorengana iritsi dena, eta Emakumeen Etxea zabaldu da. Gainera, erasorik gabeko jaiak sustatzeko programa udalerriko 11 auzotara hedatu da, Errenteriak berdintasunarekin duen konpromisoa sendotuta.
Kohesio komunitariorako proiektuak
Udal Gobernuak euskararen erabilera indartzeko neurriak bultzatu ditu, euskaltegiko A1 eta A2 mailen doakotasun aurreratua ezarriz eta euskararen ulermena hobetzeko metodologia berriak esperimentatuz.
Hezkuntzaren arloan, Herri Arte Eskolaren bitartez, eskolaz kanpoko jardueren zerbitzu berri bat sortu da jantokiko ordutegirako, 131 ikasleri mesede eginez, eta eskolako jolastokiak hobetzen jarraitu da, Bizarain Txikiren jardunarekin. Kultur arloan, Ahotsaren eta Musikaren Etxea izango denaren proiektua diseinatu da – tokiko eragileekin batera – Altzaten, Errenteriako sorkuntza artistikorako eta lankidetza kulturalerako erreferente berria izango dena.
Auzo bizigarriagoak eta zerbitzu hurbilagoak
Aldakonea eraikinaren irekierak, non ekitaldia egin zen, zerbitzuak auzoetara hurbiltzeko udalaren konpromisoa sinbolizatzen du. Funtzionamenduaren lehen hilabeteetan 30.000 pertsona baino gehiago artatu ditu, herritarren arretarako zerbitzuak, liburutegia eta gizarte-zerbitzuak eskainiz.
Hiri-esku-hartze garrantzitsuenen artean, honako hauek nabarmentzen dira: Beraun kalearen eraldaketa integrala, ia 5,5 milioi euroko inbertsioa izan duena eta espazio publikoaren 1.800 m² berreskuratzea suposatu duena; Gabierrota pasealekua berritzea eta Gaztaño auzoa eta Erdialdea lotzen dituen igogailu berria eraikitzea.
Kirol arloan, Hibaikaren ontzientzako hangar berria eraiki da Iztieta-Ondartxon, hiltegi zaharraren berritzean aurrera egitea ahalbidetuko duena.
Enplegua, berrikuntza eta iraunkortasuna
Bi urte hauetan berrikuntza, enplegua eta tokiko garapena uztartzen dituzten hiru ekipamendu estrategiko jarri dira martxan: Agustinak Zentroa, kultura- eta sormen-industriak sustatzen dituena; Oarsolan, eskualdeko enplegu-zentro berria, dagoeneko 2.300 pertsonari arreta eman diena; eta Torrekua, gizarte-ekonomiaren eta teknologia libreen laborategi bat.
Era berean, Ekiherri energia berriztagarrien kooperatibaren sorreran lagundu du Udalak, dagoeneko 140 etxebizitza energia garbi eta partekatuz hornitzen dituena.
Agintaldiaren bigarren erdialderako erronkak
Agintaldiaren bigarren erdian, Udal Gobernuak proiektu estrategikoei ekingo die, Galtzaraborda auzoa biziberritzeko estrategiari hasiera emanez. Estrategia horren barruan, haurreskola berri bat eraikiko da, Parke eta Mandoegi kaleak berrituko dira eta herritarrekin batera Urdaburu parkearen eraldaketa diseinatuko da.
Barandiaran parkearen eraikuntza ere osatuko da, Ahotsaren eta Musikaren Etxea eraikitzeko obrei ekingo zaie, Iztieta-Ondartxoko hiltegi zaharra berrituko da, eta zerbitzu berriak jarriko dira martxan, hala nola, udalerrira iritsi berri diren pertsonentzako harrera-bulegoa eta LGTBI+ behatokia.
“Bidearen erdian gaude — amaitu zuen Otaegik —, eta hasi genuen ilusio eta ardura berarekin jarraitzen dugu lanean. Datozen bi urteak erabakigarriak izango dira hasitako proiektuak burutzeko eta etorkizuneko Errenteriari ate berriak irekitzeko: guztiok hobeto bizi ahal izango garen herri partekatu bat.
