Eskola Kirola

Kirola eta jarduera fisikoa guztion bizitzan txertatzeak garapen pertsonal aberatsagoa bermatuko digu. Ohitura horiek eskuratzeko, prozesu bat igarotzea ezinbestekoa da eta prozesu hori hasierako adinetan ematen da. Baina ez edonola, haurraren garapen etapak eta ezaugarriak errespetatu behar ditugu, eta horretan dihardu Eskola Kirolak: garaian garaiko kirol ohiturak eragiten kirol jarduera hezigarrien bidez; izan ere, bat egiten dute heziketa sistemaren eta haren etapen helburuekin.

Helburuak

• Ikasleek kirol oinarri sendoak barneratzea da Eskola Kirolaren helburu nagusia, bizitza guztian zehar edozein jarduera fisiko praktikatzeko gai izateko.

• Neska-mutil guztien nahi eta beharrak aseko dituzten jarduera erakargarriak sortzea da Eskola Kirolaren helburua eta horretarako ikasle guztiak izan beharko ditugu kontuan: trebeenak, ez hain trebeak eta behar bereziak dituztenak.

• Herrian eta eskualdean dauden kirolak eta jarduerak jorratzen dira (berriei ere bidea irekiz), Eskola Kiroleko etapa amaitzean ikasleak bertako elkarte eta bestelako eskaintzetan parte hartu ahal izateko prest egon daitezen.